Atardi

Atardi

Ta pa kiko mi no sa

Ma esta tristu mi ta bira

Tur atardi ku mi mira

Solo baha den lamá!

Talbes ta un presintimentu,

O ta un recuerdo kisás;

Podisé n’ ta nada mas

Ku un cos di temperamentu.

P’adilanti podisé

Mi ta mira na caminda

Un doló ku n’ nace ainda,

Ma ku lo mi conocé?

Tin kisás den mi memoria

Un doló masjá scondí,

Masjá bieu, ku mi sintí

No por rebiba su istoria?

O talbes mi nervionan

Tin, sin causa, orror di Pretu,

I dje abismo scur i ketu

Meimei dj’awe ku majan?

Mi no sabi ki armonía,

Ki secretu relasjon

Tini den mi curason

Ku cabamentu di un día.

Ma spiritu di doló

Mi ta sinti camna ku mi,

Ora Solo ta bai drumi

I ta bisa: TE AWORÓ!

TE AWORÓ? Ma enter anochi!

Esta largu anochi ta!

Cuantu cos ku nos no sa

E ta sconde den su scochi!

TE AWORÓ? Ma te majan

Hopi ora falta ainda;

Cuantu istoria na caminda

Sin ku nos sabi di nan!….

Promé Solo bolbe hari,

Tempu tin pa hopi cos;

I Dios sa cuantu di nos

Morto den dj’anochi a bari!

Causa mi doló no tin;

Ma esta tristu mi ta bira

Semper ku mi para mira

Dia jega na su fin!

J. S. Corsen, 1905