HORAE IMMACULATISSIMAE CONCEPTIONIS VIRGINIS MARIAE

AD MATUTINUM

Temporis longi miseratus orbis

Conditor fletum, senio gravatam

Angelum summo solio Polorum

Mittit ad Annam.

Ille supremae paries senectae

Filiam dicit superi Parentis, Quae suo claudet genitum beato

Viscere Verbum.

Haec creaturas superabit omnes,

Omnibus foelix memoranda saeclis,

Nuntio gaudet Joachim beatus

Certus eodem.

Sit Patri, Nato decus, et beato

Flamini, et sanctae meritae Puellae,

Quae carens omni macula creatur

Munus honoris.

AD PRIMAM

Terminal noctis tenebras Maria,

Gaudium mundi jubar exoritur

Praevium Solis, decoratque coelum

Mane rebescens.

Jam maris pulchra mediante Stella

Gaudeat tellus, mare, noxijque

Criminum, Jesu Genitrix benigna

Nascitur orbi.

Jubilant cives, superi, stupescit

Ordo naturae sterilem Parentem;

Virginem nasci sine labe saevus

Ingemit Orcus.

Sit Patri, Nato decus, et beato

Flamini, et mira specie decorae

Virgini, cujus radiatur orta

Machina laudis.

AD TERTIAM

Missus é coelo Gabriel Mariae

Nuntiat Verbum fore virginali

Ventre clausuram Patris, unde manet

Gratia mundo.

Hic Ave cantat, reparatur Eva,

Gratiae Virgo fideique plena

Credit, et magni sobolem Parentis

Concipit alvo.

Spiritus sanctus refovens obumbrat

Quae Dei sese famulam profatur,

Cumque sacrata gravidam coaptat

Virgine Matrem.

Sit Patri, Nato decus, et beato

Flamini, et laudes meritae Mariae,

Quae Dei Natum meruit sub arca

Claudere ventris.

AD SEXTAM.

Surgit in montes properans Judae

Virgo praeconem Domini gerentem

Visitans matrem, placida propinquam

Voce salutans.

Audit ut vocem genitrix Mariae,

Ventris exultat puer in cubili

Virginis clausum thalamo supremum

Numen adorans.

Virginem mater resonat beatam,

Sed Creatori referens Maria

Gloriam, digno modulatur ore

Jubila laudis.

Sit Patri, Nato decus, et beato

Flamini, et dignae tibi Virgo laudes,

Cujus ad voces hilaratur infans

Viscere clausus.

AD NONAM.

Sol refulgescit, tenebrae fugantur,

Lux Polum vestit, radiatque terris,

Exit effectum caro de Parente

Virgine Verbum.

Gloriam cantant acies Polorum

Luminum Patri, placidamque terrae

Nuntiant pacem, Puerumque natum

Urbe Davidis.

Pastor accurrens videt involutum

Parvulum pannis, paleis, jacentem,

Quem sedet juxta, niveoque lactat

Ubere Mater.

Sit Patri, Nato decus, et beato

Flamini, intactae gravido pudori,

Quae Patris Verbum peperit superni

Gloria Matris.

AD VESPERAS.

Ó tuum quanti gladius doloris Cor penetravit Genitrix salutis,

Dum vides dulcem perimi cruento

Funere Natum!

Nempe cum serves medio repostum

Corde, quos sentit, toleras dolores,

Quae tuum Natum, tibi perforarunt

Vulnera pectus.

Fac simul tecum crucier dolore

Eiulans plagas Domini cruentas,

Vepribus, flagris, cruce, morte, dira,

Vulnerer hasta.

Laus Patri, Nato, pariterque sancto

Flamini, et Matri decus ingementi,

Cui dolor Nati penetravit alto

Corda dolore.

AD COMPLETORIUM

'Tollit ad coelos animam Redemptor

In suis ulnis Genitricis almae:

Candidum Fratres niveo recondunt

Marmore corpus.

Curia Jesus comitante Olympi

Portat é coelis animam, suoque

Corpori jungit, meritumque Matri

Pendit honorem.

Manna de sancto tumulo scaturit,

Trinitas Matrem super Angelorum

Ordines tollit, Dominamque toti

Praeficit orbi.

Sit Patri, Nato, pariterque sancto

Flamini virtus; Dominaeque mundi,

Quae Deum juxta residet perennis

Munera laudis.

Recommendatio

Has preces fundo tibi, Virgo Mater,

Quae cares naevo speciosa tota,

Ut mihi in casto tribuas pudicam

Corpore mentem.

Amen.

LAUS DEO.